من ملاحظاتي في بلاد المحجر

نظراً لكوني من أطفال الثقافة الثالثة؛ لا أستطيع إلا أن أضع مقارنات بين مختلف الثقافات والحضارات التي شاهدت، و ملاحظاتي في بلد "متقدم" كالولايات المتحدة ليست بأقل إدهاشاً من تلك التي قد يراها المرء في دول معدمة كغينيا والكونغو. ورغم ما يشاع عن هذا البلد من تطور تقني و حداثة أخاذة إلا أن في ثوبه المُبَيّض بقعاً صارخة السواد لا تستطيع العين إلا أن "تفنجر" لحظة رؤياها. ونظراً لعلمي بضيق صدر الكثيرين من قراءة ما كتب بالفصحى؛ سأكتب قصة بالعامية المحكية حتى تصير أسهل هضماً و أطيب فهماً.

هادا يا سيدي، وأنا هون بأمريكيا؛ إجاني مبلغ من المال على شكل شيك بنكي، ومن شدة فرحتي وخوفي عليه رحت عالبنك متل الطير الطاير لحطو بحسابي عندن، لحطو ما لأصرفو ديروا بالكن هه! المهم لقيت أقرب فرع جنبي فاتح كونو اليوم سبت و معظم الفروع مسكرة، وصلت عالفرع و دخلت، استقبلتني كاشيرة من فئة المهاجرين بتكشيرة رجعتلي نوستالجيات كتيرة من الوطن الحبيب، ورغم إنو الضفدع اللي ركب على راسها وهي عم تقطع الحدود الجنوبية لساتو ما نزل؛ قلبت خلقتها ولولا ستر المولى كانت رح تستفرغ لما طلعلها إسمي عالشاشة، المهم أخدت الشيك و تفحصتو، و بلشت تدئدئ على هالكيبورد بدون ما تحكي معي، بلا طول سيرة، خلصت شغلها وزتتلي وراقي وقالتلي بصيغة مألوفة جداً: روح هلأ ويوم الاتنين منعطيك جزء (1% من قيمة الشيك) والباقي بعد 12 يوم، طبعاً طبش على راسي سطل مي متلجة و كنت متوقع إنو هلأ بدو يطلع زياد سحتوت أو زكية زكريا و يقولولي اضحك للكاميرا الخفية، واضح إنن كانوا لساتن علقانين بالمطار بنيويورك مشان الإجراءا الامنية، قلتها كيف يعني؟ شو مشان شيك مصدق و بدي المصاري ينزلوا بحسابي اليوم قبل بكرا؟ قالتلي بما معناه حرفياً: هادا اللي عندي، ركبني الجني أب سمير و قلتلها وينو مديرك المصون، شاورت بالبنان على كشك صغير بطرف الصالة، رحت ولا كحلوشة تانية نطت عالباب و قالتي:
- خير بشو بقدر اخدمك؟
= إجيت حط شيك و لسبب ما الشيك ما رح ينصرف لبعد 12 يوم و حابب أعرف ليش.
- بتصير سيد، المعاملة بهدا وقت ولازم نبعت الشيك عالفرع المركزي لحتى يتأكدو إنو إلو رصيد. مافينا نصرفلك ياه هيك.
= طيب فهمنا بس الشيك مصدق مانو شيك عادي، وبعدين ليش 12 يوم؟ بدكن توصلوه باليد؟
- نحنا بيحقلنا نوقف صرف أي شيك لمدة معينة لحتى نتأكد منو
= إيوا؟! شي حلو كتير! وهل لازم اتوقع هالشي كل مرة بودع فيها شيك
- حسب الظروف!
= زانصخا....

الجدير بالذكر إنو قبل كام يوم كنت بمحل و استعلموا عن رصيدي الائتماني الساعة 8 بالليل بيوم عطلة كمان و ما أخدت 5 دقايق، بس إنو يعطوني مصرياتي هاي بدها بصمة أوباما عالشيك، بزمن العنتر نت و ببلد الاتصالات السوبر سريعة واللا بيروقراطية بدهن 12 يوم ليصرفو شيك، مطرح ماني جاي مانو "متقدم" كفاية ويمكن ما عندن مراعاة أحسن للزبون وخصوصي الفرع 1 لكن عالأقل الشيك بينزل بنفس اليوم، يا سيدي أنجأ تاني يوم بتكون المعاملة خالصة. بغض النظر عن كون القصة صارت لإسمي و جنسيتي أو لكون النظام فلتان عندن و بدهن يجمدوا مصاري العالم قد ما فيهن أو لأنن بالفعل متخلفين، يضربوا هنن و بلدن ال"متقدم" و كل جحش بيطلع بإيدو يرجع اليوم ومارجع. نارك ولا جنة غيرك يا بلدي.