يا ليل ما أطولك

يا ليل ما أطولك

يوم عن يوم
عدد البشر عم يكبر
متلو متل الإحساس بالوحدة
بيجوز الأعداد عم تزيد
لكن التعاطي أكيد عم يقل
بروح عالشغل كل يوم
وجوه لساتا عم تدور على الصحوة بكاسات القهوة
ملت الابتسام و ما عادت تذكر كلمة صباح الخير



بيكمل صباحك بوجوه اجسام موصولة على ماكينات
وحدة للتنفس
التانية للأكل
و تالتة بدل الكلاوي
والرابعة لتخليك مطرمخ و مدفوس
تعاطيك بيكون مع كبسات مضواية على تابلو كهربا
على تخت متجهم و قالب خلقتو
و كل تخت فيهن حاوي قصة موت عم تتأخر
عم تستنى سحبة فيش
ما عاد للمشاعر الإنسانية مكان بغرف العناية المركزة
صار فيني أقعد بنص القسم عم آكل بوظة
بدون أدنى اهتمام لقصص المآسي اللي حواليي

هادا عمرو 45 سنة
ما بعرف شو عامل و شو دارس
ولا كام ولد برقبتو
كل اللي بعرفو إنو قبل اسبوع كان ماشي بالشارع متلي و متل ملايين غيرنا
واليوم هو موصول بالنباريج والأسلاك
عم يدور عالحياة من علبة تنك
لانو ميت و لانو عايش
حالة جديدة من التعذيب قدرنا نخلقها نحنا البشر، ما بعرف ليش و كرمال مين


كل يوم بشوفو
أو بالواقع بشوف الماكينة الي جنبو
-كيفك اليوم استاذ؟
= تيت.....تيت....
- نمت منيح مبارح؟
= تيت.....تيت....
- شلون حاسس هلا؟
= تيت.....تيت....
- لا شر عليك انشالله
= تييييييييييييييييييييييييييييييييييييييييييييييييي ت.................

خلص يوم تاني
و صار وقت الرجعة
والرجعة بدها بنزين
وبالكازية في هالماكينة الكبيرة
شغلة حضارية متل ما بيوصفوها
بتحط الكرت
تك تك
بتعبي بنزين
تك، خلصت لحالك
يا سلاااااااااااام

خلص مخزوني الاستراتيجي من العصير و البسكوت
صار لازم روحة عالسوبرماركت.
و ماكينة تانية فل أوتوماتيك
بتحاسبك عالأغراض
دون أي تدخل بشري
و تك تك.. تك تك تك.......
بعد عشا متواضع
من مطبخي الضايج
صار وقت الترفيه
و بما إنو الرفق انطلقوا بلايي
و بما انو تأخر الوقت أصلا
و خير جليس في هذا الزمان انترنت
صحبة أليفة مع ماكينة تانية
عم حاول لاقي أية إشارة حياة
بس الساعة12 نص ليل
التوقيت بسوريا 7 بكير
ميات الملايين سهرانين معي عالنت
كلنا سهرانين مع بعض
و كلنا سهرانين لحالنا

آاااااااااااااااه
شو مشتهي احكي
احكي بلساني
بدون من نقور على قطعة بلاستيك
بدون ما يكون الجواب فيه تيك أو توت
مشتهي شم ريحة تم
شوف بزئة طايرة من "فــ" شي حدا
اسمع صوت ضحك
ضحك ولو مصطنع
بس مافيو ههههههههه ولا لوووووووول
مشتهي فنجان القهوة تبعي ما يضل لحالو
والكنبية التانية تكون أدفى وعم تتحرك
مشتهي بطل اطلع بالمراية لشوف شخص تاني
بس يمكن تأخرت
يمكن خلص هداك الوقت
وهادا زمان جديد
زمان ال" تك تك"
وما بقي إلا إستنى جنية القمر
هاي اللي بتجي بالليل و مع اليأس
اليأس وصل لآخرو

بس الليل لسا بأولو
ويا ليلي ما أطولك......